MIR Communication Design Statement Self Profile Digital Portfolio The Quote E-mail me

 

"think global, act local"
penyuntuk besekula
penemu baru, penemu lama

 
  Nama berita? (How are you?)  
     

 

This article is written in Iban

Selamat datai. Gaga amat ati laban nuan olih ngenatai ka diri kitu. Aku nyebut 'site' aku tu 'ruai'. Laban kebuah pia, 'ruai' tu endang alai tauka palan kitai bansa ngulu maioh bengkah pengawa asal kitai. Ba runding aku manah amat leka jako 'site' [English] tu tau disebut 'ruai' dalam jako kitai.

Selamat bekelala. Aku arap ka bisi maioh agi ari bala kitai ka rindu ati deka nyemak ka diri enggau pengawa IT tauka 'on-line media' baka internet tauka ba bagi 'programming', designing, tauka 'network engineering'. Semua pengawa ba bagi internet tu tau mai penguntung ka bala kitai ka ke maia hari tu. Semua bansa bukai ba dunya tu endang majak ngemansang ka technology ti besangkut paut enggau penemu communication. Dunya tu nyau asai ka mansang mit-semit laban mensia nyau senang amat berandau enggau pangan diri taja pan penyaioh antara sida beribu-ribu kilometer. Kebuah pia, laban technology ti mai kitai semak. Ba senentang kitai sebala [kitai bansa], nyau mansang manah mega ka diatu laban nyau makin maioh anembiak rabak baru ka nitih ka singkang bala orang lalu deka belajar ka penemu baru tu. Aku ka mai bala kita berunding ka leka jako 'penemu baru'.
 

| top |

Sebedau tu aku bisi nekan ka jako peransang bansa orang putih ari menoa New Zealand, "think global, act local". Aku deka nerang ka reti jako nya ba contact bansa kitai baka tu: berunding baka orang bukai ka udah mansang, ngereja pengawa ti enda limpang ninggal ka diri ari penemu baru [technology tinggi], sanggup nerima penemu [technology] ti dibai ari penemu sekula, nerima pendiau diri dalam kitai nyingkang nitih ka sida ti udah mansang dalam pengidup. Tang taja pia, dalam semua pengawa kitai ti deka ngemansang ka diri kitai empu, ingat meh ka penatai diri. Ngambi ka chonto, orang Jipun, dipeda mansang, sama bela enggau pemansang menoa America tang sida enda muai adat diri enggau enda ingat ka penatai diri. Orang Jipun mansang laban sida agi nyadi bansa Jipun enggau megai 'value' bansa sida tang sida rindu ka technology, rindu ka dagang besai [corporate] serta rindu ka berunding ka penemu nengkebang [invention].

Penanggul ngemansang ka penemu sekula: Nadai duit?, Rumah jauh ari rumah sekula?, Enggai ninggal ka apai indai-enda betah?, Sekula semina masau umur?, Sida apai enggau indai ngasoh tumu bebini/belaki?, Nadai meda penguntung besekula?, Nyamai agi bekuli ari besekula?, Nadai sukong ari kaban belayan, lalu antara kebuah ka bukai nya laban diri empu lembau [ngelusu]. Penyuntuk duit endang penanggol semua orang, ukai semina ba kandang bansa kitai. Bah! baka ni ka sida olih melanja anak sida sekula?. Pemujur kitai besekula endang bepanggai ba diri kitai empu ka besekula tu dulu, manah amat enti kitai empu bisi juluk ati maia kitai ka besekula lalu mupuk belajar kena ngenyemak ka diri enggau juluk ati kitai nya tadi.
 

| top |

Nyadi tu pasal penyuntuk duit kena besekula. Ia ka terubah ba pengawa ngemansang besekula tu, pengerindu nuan empu ka sekula-love both school and knowledge. Udah nuan rindu ka sekula, aku pecaya ka nuan tau jampat agi nangkap batang ajar sida pengajar-cikgu, tutor tauka lecturer nuan. Laban ukai semina pengawa sekula aja ti beguna ka pengerindu [interest / minat], semua utai ti dikeraja kitai tau nyadi manah agi enti kitai bisi pengerindu ngereja ia. Duit endang ia beguna amat dikena besekula. Maioh orang ti enda olih nyambung sekula laban suntuk duit, tambah mega diatu economy menoa kitai tu enda tentu manah, nya alai pelaba ka aku bisi ga penanggol mimit ngiga sponser kelebih agi bala anembiak ti deka besekula tinggi. Sapa olih nulong kitai deh? Enggi bala ti bisi penatai duit ka manah, enti bisi anak ti agi besekula, tau nyimpan mimit ka 'fund' sida sekula tinggi ila.

Ukai mandang ka penusah kitai bala ditu tang mai kitai sama berunding. Tusah amat ati aku berunding ka chara maioh ari bala kitai beguna duit sida. Bisi sekeda bala apai ka agi ngembuan pengerindu ka pangawa nyabong, be-irup ka ai bisa enggau bemain judi. Nadai salah utai tu taja pan bisi pengarap ka nagang pengawa ti baka tu. Ba pengidup kitai, tau diketu ka pengawa tu, laban enti bisi duit tau simpan kena ngemansang ka ruang bilik diri. Kitai ngirup ai bisa maia berami tang ukai ka ai irup sehari-hari. Enggai ka dikerandau ka orang, "bisi duit kena meli ai bisa, meli insap, bejudi tauka nyabong tang nadai duit kena meli belanja rumah tau ka besekula ka anak". Patut berunding kitai ka apai ka jako orang ti baka nya.

Kita ka indai, ukai aku madah ka utai ti patut digaga kita, anang salah runding. Nyebut jako 'indai', tu besai amat tanggungjawab ba ruang bilik. Aku ngasai ka indai aku empu, ia mah pun ti meransang kami menyadi ngambi ka nyadi lebih menyana agi enggau ngemansang ka diri. Bisi jako kitai Iban 'pakit', bisi bala kita nemu reti jako pakit tu? Leka jako pakit tu mai reti enggai alah. Bisi siti leka jako ti nyau deka sama munyi enggau leka jako 'pakit' ia nya 'pekit'. Jako 'Bepekit' reti ia betanding. Pengawa dipeda orang, baka kitai bepekit belawa, merau, enggau bepekit kumang / keling. Tang 'bepakit' tu enda dipeda orang laban ia belaboh lalu tumbuh di dalam ati kitai. Dua chara bepakit, keterubah chara ti enda manah enggau ti ke dua ia nya chara ti manah. Chara ti enda manah, bepakit ka reta. Begedi ati meda orang bisi utai, enda tau lebih ari sida enti olih. Orang meli emas, ia mega deka meli ka lebih agi, orang meli kereta Proton, ia deka meli Toyota tau ka lebih agi baka kereta Mercedes. Gatal ati meda orang ka bisi utai tang enda merening timbang diri, sampai sanggup ditinggang utang, ukai ka tu ngenusah ka diri empu?. Kitai meli utai laban kitai beguna ka ia tang ukai kena kitai nunjuk ka orang kitai tu raja, maioh reta tau ka madah ka kuasa [power] diri empu.

Baka ni chara 'pakit' ka manah? Kena chara pakit kitai ka enggai alah nya enggau ngaga pemanah ka diri empu, bala kaban-belayan, bala ka begulai pendiau enggau kitai dulu. Enda ibuh berunban deka megai menoa. Nyadi ka tuai bilik diri empu dulu pan udah manah. Enti bisi anak ka mit, simpan lalu guna anak duit kitai kena ka belanja sida ti besekula. Enti nadai agi anak ka besekula, tolong bala anak menyadi tauka orang bukai ti beguna ka tulong duit kena besekula ka anak sida. Manah agi nguna duit kitai dikena ngemansang ka quality pengidup kitai ari ti dibasau ngapa. Tu endang baka ka melabur mega, melabur ba anak dipeda nuan sida mansang besai, bisi duit simpan ti dikena sida nyambung sekula tinggi lalu udah nya arap ka tau megai pengawa ka manah.
 

| top |

Penemu baru, penemu lama. Dunya mansang lalu chara kitai ngidup ka diri pan mansang. Penemu lama enggau penemu baru bisi jauh amat beda tang tuju pengidup kitai endang agi sebaka: 'tungkat pengidup'. Kelia orang belajar bumai, belelang ngiga penemu, nampuk ba bukit ngicha ka betara meri batu padi tau ka rajut ngambi ka kering. Bai tulang kering enggau bisi peransang batu padi, bulih mega sida padi. Ngenan ka menoa enggai ka alah kayau, kebuah tu bala sida aki kitai kelia belajar ngamboh ilang, nyabor enggau sangkoh. Pia mega sida ini kitai, sida belajar beranyam, ngebat enggau betenun ngambi ka dipuji orang laban sida tu indu pandai tau nengkebang.

Nyadi diatu, dunya technology. Kini kitai deh? Baka sida aki ini kitai tadi meh, mupuk bejalai begiga ka penemu. Perintah menoa meransang kitai rindu ka pengawa IT [information technology]. Anang mega kitai enda mending. Semua orang baru ba penemu IT tu. Kebuah pia anang ngumbai diri udah kelalu laun. Belajar ka computer baka orang bukai mega. Taja pan kitai tu apai tau ka indai orang ba penemu aku agi mega enda laun belajar ka computer. Nadai takat umur ba penemu tu.

Tu jako lalau ba ati aku empu,"Sehari tu manah ari kemari lalu pagila aku ka mansang manah agi ari sehari tu". Reti nya, mansang manah-semanah meh quality pengidup kitai. Tang taja pia baka kitai bejalai meh, bisi maia ia kitai tesangkut ka batu tang bejaga enggai ka terap, enti sema terap, angkat baru lalu terus majak ka singkang.
 
     
  LINKS

1. Sarawak Dayak Community Website
2. Randau Ruai
 
     
 
 
  Copyright©1998 Louis R Kanyan. All right reserved. [A member of the MIR Web Design Team] Created with a Power Macintosh®